Wednesday, August 15, 2018

குறி வெளிச்சம்

இந்த வாழ்க்கையில் எனக்குக்
குறை ஏதுமில்லை
கனவுகண்டு பிள்ளைபெற்று
சீரியலில் அழுது திரைப்படம் பார்த்து
புடைவை நகை சேர்த்து
முத்தம்வாங்கி முத்தமிட்டு
சமைத்துப்போட்டு சண்டையிட்டு
தோல் சுருங்கி நரைவிழுந்து
தள்ளாது போய்
எப்படியோ எங்காவது
ஒரு பெண்ணாக வாழ்ந்து
செத்துப்போகிறேன்.
ஆசிட் ஊற்றி
தெருவில் கழுத்தை அறுத்து
தீயுடலோடு அணைத்து
வாயில் உள்ளாடை திணித்து வன்புணர்ந்து
வெற்றுடம்பாய் வீசியெறிந்து
இருட்டுக் கோயிலுக்குள் புணர்ந்து கொன்று
புகைப்படச் செய்தியாக்கி
மெழுகுவர்த்தியேற்றி
உங்கள் குறி
உருவாக்கும் எந்த வெளிச்சமும்
தேவையில்லை எனக்கு.


எழுதிய நாள் : 2017ல் பெண்கள் வன்கொடுமை பற்றிப் புழுங்கிக்கொண்டிருந்த ஒரு நாள்

No comments:

Post a Comment