துளிர்க்கும் சருகுகள்

முதல் சம்பள தின‌த்தில் தங்கையின்
“அண்ணா எனக்கு புது வாட்ச்” ம்,
தலை தீபாவளி விருந்தில் மாமனாரின்,
“ஸ்வீட் எடுத்துக்கங்க மாப்பிள்ளை” ம்,
சிணுங்கும் செல்ல மகனின்
“அப்பா ஸ்கூல் ல பிக்னிக்…” ம்,
எதிர் வீட்டு கல்லூரி மங்கையின்
“குட் மார்னிங் அங்க்கிள்” ம்,
ஆசை மகளின்
“எனக்கு ர‌வியை ரொம்ப பிடிச்சிருக்குப்பா” ம்,
காய்கறி கடைக்காரரின்
“எல்லாம் ஃப்ரெஷ் சார்” ம்,
ஆட்டோ இளரத்தத்தின்
“ஓரமாப் போ பெர்சு” ம்,
வாழ்க்கை துளித்துளியாய்
சருகாகிக் கொண்டிருப்பதை
சொல்லாமல்
சொல்லிக் கொண்டிருக்க,
நேற்று ரோட்டோரத்தில் கேட்ட‌
கல்லூரி நண்பனின்
“டேய் மாப்ள கணேசா”
மட்டும்
புதிதாய் சில துளிர்களை
தளிர்க்கச் செய்யும்.