உடும்பின் காலடிக் காலம்

எப்போதும் என் நிறுத்தத்தில் இறங்கியதில்லை நான்

மழை ஒரு திசையில் அடித்துச் செல்லும்

பாடல்களில் ஒரு முள்கொக்கி தொங்கும்

ஐந்து விரல்களில் பத்து விரல் சுவடுகள்

உறக்கத்தில் இடறும் கண்ணீர்

முயக்கத்தில் வேறு வியர்வைச் சுவை

மரக்கிளையின் மீது உதிரும் இறகுக்கு வானம் பார்த்து ஏக்கம்

நீளக்கொடியின் கொழுந்துகளில் நரம்புகளென வேர்கள்

தழும்புகளை வருடும் விரல்களில் வெட்டுக்காயத்தின் பிசுபிசுப்பு

பொடியும் சுவரைப் பற்றிக்கொண்ட உடும்பின் கால்களைச் சுற்றி

காலம் நடந்துகொண்டிருக்கிறது

தந்திகளில் பின்னிய சிலந்திக்கூடுகளில்

விடுபட்ட நட்சத்திரங்களைத் தேடி

அளைகின்றன இசையறிந்த விரல்கள்.

எழுதிய நாள்  6 அக்டோபர் 2018