Wednesday, October 30, 2019

தொட்டி மண்ணிற்குப் பழகும் வேர்கள்


விடுமுறை நாளுக்குப்பின்
திறக்கும் அறைக்குள்ளிருந்து
முகத்தில் பாய்கிறது வெப்பத்தின் நகங்கள்

முழுவீட்டை வெளியேற்றும்
தனியறையின் வெம்மை
நிறைக்கிறது நுரையீரல் பைகளை

பிரியமானவள் முதுகுப்பையில்
திணித்து அனுப்பிய நட்சத்திரங்கள்
குடிமேசையின் பியர் மூடிகளில் உறைகின்றன

துவைக்காத திருநாள் உடையின்மீது
கொசுமுட்டைகளின் கொலாஜ் சித்திரம்

பக்கத்து அறையிலிருந்து ஒலிக்கும்
தாபப் பாடலில் கல்லெறிகிறது
தெரு யாசகனின் பசித்த குரல்

தொட்டி மண்ணிற்குப் பழகும்
வேர்களை உறிஞ்சப் பற்றுகின்றன
அஜினமோட்டோவின் எட்டுக்கரங்கள்

சுவர்ப்பிடியை இழந்த பல்லி
இறக்கையற்ற கரப்பானாக
உருமாறி
ஓடத்தொடங்குகிறது
பொருள் தேடு நகர வீதிகளில்.


No comments:

Post a Comment