வெம்மைப் புகை (அ) வாழ்த்துகள்

உனக்கும் எனக்குமென

நான் வனைந்து வைத்திருந்த நாளின் பிரதியில்

நின்றுகொண்டிருந்தாய் வேறொருவனோடு

எளியதும் துரதிர்ஷடமானதுமான

ஓர் உறவுச் சொல்லால் அறிமுகப்படுத்தினாய்

என்னை அவனிடம்

தோள் மாலைக்கடியிலும்

அடர்நிற உதட்டுச் சாயத்திலும்

நசுங்கிக்கிடந்தன

என் முத்தத்தின் தடங்கள்

அவசரமாய் நிகழ்ந்துவிட்ட

நம் கூடலின் வெம்மை

அலங்கார விளக்குகளின் ஜொலிப்பில்

நிம்மதியாய் மூழ்கிப்போயிருந்தது

மருதாணி பூசிய ரேகைகளுக்குள்

நொடிப்பொழுது வாழ்ந்துவிட்டு

உதிரமற்ற புன்னகையுடன் வெளியேறுகிறேன்

உங்களைத் தாங்கிய ஃப்ளெக்ஸ் போர்டைக் கடந்து

நீ பொய்த்த சத்தியங்களால் தகிக்கும்

என்னறையின் இன்றைய இரவில்

பழைய நாட்குறிப்பொன்றின்

காமம் வீசும் பக்கங்கள் மீது

பல்லிகள் புணர்ந்திருக்கும்.

எழுதிய நாள் : 08-01-2018